नर्थ क्यरोलाइनामा महाकवि देवकोटा जयन्ती सम्पन्न

इनेप्लिज २०७५ मंसिर १० गते ११:२६ मा प्रकाशित

नर्थक्याराेलाइना माेरिस्भिल अमेरिकामा अन्तर्राष्ट्रिय नेपाली साहित्य समाज नर्थक्याराेलाइना च्याप्टर र स्थानिय नेपाली संस्था नेपाल सेन्टर अफ नर्थक्याराेलाइनाकाे संयुक्त आयोजनामा साहित्यिक रचना वाचन, महाकवि देवकोटाको कृतित्व र व्यक्तित्वमाथि प्रवचन र देवकोटाका गीत गाएर महाकवि लक्ष्मीप्रसाद देवकोटाको ११० औँ जन्म जयन्ती भब्यताका साथ सम्पन्न भएको छ। अन्तर्राष्ट्रिय नेपाली साहित्य समाज नर्थक्याराेलाइना च्यापटरका अध्यक्ष शिखर दुलालको अध्यक्षता र च्यापटरकी वरिष्ठ उपाध्यक्ष नम्रता गुरागाईको उद्घोषणमा संचालन गरिएको कार्यक्रममा सहआयाेजक सस्था नेपाल सेन्टर अफ नर्थक्याराेलाइनाका अध्यक्ष डा वटु शर्माले सबैलाई स्वागत गर्नु भएकाे थियाे ।

अन्तर्राष्ट्रिय नेपाली साहित्य समाज नर्थक्याराेलाइना च्याप्टरका सल्लाहकार ईश्वर देवकाेटाले महाकवि देवकोटाको व्यक्तित्वबारे प्रकाश पार्दै महाकवि देवकाेटा नेपाली साहित्यका विशाल समुद्रै समान रहेको र उनको योगदानको बयान जति गरेपनि छाेटाे र अपूर्ण हुने भन्दै देवकाेटाजस्ता महान व्यक्तिको सम्झना गर्दै यसरी प्रवासमा जयन्ती मनाउनु भनेकै नेपाली साहित्यलाई सम्मान हाे भन्नुभयो ।

कार्यक्रममा भरत विष्ट , रमेसप्रसाद गाैतम, नन्दलाल सुवेदी , दिजा पाण्डे, दिव्या पाण्डे , वासु भट्टराइ, सबिता विष्ट, गीता बस्नेत, विक्रम गाैतम, शिशिर खनाल, ऋषि वस्ताकाेटी, सुजाता ढुङ्गेल, नम्रता गुरागाई र शिखर दुलालले आ-आफ्ना आफ्ना कविता र गजल पाठ गर्नुभएकाे थियाे ।

कार्यक्रममा प्रस्तुत रचनाहरूमाथि समिक्षात्मक टिप्पणी प्रस्तुत गर्दै साहित्यकार डा हरिहर भट्टराईले कविताहरु लेखनको परिपक्वताको हिसावले र भाव र कलाको आधारमा विविध खालका भए पनि समग्रमा उत्कृष्ट रहेको बताउनुभयो । उहाँले लक्ष्मीप्रसाद देवकाेटा वास्तवमै इश्वरीय बरदान पाएका साहित्यकार भएको र उनका हरेक रचना संधैकालागी उत्कृष्टै रहने कुरामा दुईमत नहुने बताउनुभयो ।

कार्यक्रममा नगेन्द्र नेउपानेले महाकवि देवकोटाको आफुलाई मनपरेको एउटा कविता प्रस्तुत गर्नुभएको थियो । विराेध तिमल्सिना र बाल प्रतिभा निर्बिरोध तिमल्सिनाले मुनामदनकाे गीत गाउनुभएकाे थियाे भने दिपेन्द्र अर्यालले महाकवि देवकाेटाकै ” कुन मन्दिरमा जान्छाै यात्री ” गीत गाएर सबैलाई मन्त्रमुग्ध पार्नुभएकाे थियाे ।कार्यक्रममा नर्थ क्यरोलाइनाका साहित्य अनुरागीहरूको उत्साहप्रद उपस्थिति रहेको थियो ।

प्रतिक्रिया