बरालको ‘प्रतिरूप’ उपन्यास बजारमा

इनेप्लिज २०८१ पुष ७ गते १३:३१ मा प्रकाशित

डिसेम्बर, २२, काठमाडौँ । खगराज बरालद्वारा लिखित दोस्रो उपन्यास ‘प्रतिरूप’ बजारमा आएको छ । साङ्ग्रिला मिडिया ग्रुप प्रा.लि.ले प्रकाशन गरेको यो उपन्यासको सम्पादन होम भट्टराईले गरेका छन् । एघार अङ्कमा सीमित गरिएको यो उपन्यासमा पृष्ठ २३८ छन् भने मूल्य ४९५ कायम गरिएको छ।

यथार्थ विषयवस्तु र मौलिक कथालाई समकालीन समाजका भोगाइहरूसँग अन्तर्घुलन गरी आख्यानमा उतार्ने बरालको ‘प्रतिरूप’ मा धैर्य र उत्साहको भल बगेको छ । नेपाल र भारतका विभिन्न पर्यावरणमा जन्मिएर, हुर्किएर नेपाली भावनामा फैलिएको प्रतिरूप द्विदेशीय परिवेश, भाषा, संस्कृति, संस्कार र सभ्यताको सङ्गम
हो ।”

उपन्यासमा लेखक बरालले पैतिस चालिस वर्ष पहिलाको नेपाली सामाजिक परिवेश, पुरुष तथा महिलाले भोग्नुपरेका पीडा, पहाडी, मधेशी तथा भारतको असम तथा मेघालयको पर्यावतरणमा कथा उनेका छन् । नागरिकता प्राप्त नहुँदाका पीडा, व्यक्तिगत घटना दर्ताका झमेला र विधवा र भिन्न संस्कृतिबिचको विवाहबाट उत्पन्न उल्झनलाई कथानक किसिमले अगाडि बढाएका छन् । यस उपन्यासमा कथा भन्ने शैली पूर्वदीप्ति पद्धतिमा आधारित छ । उपन्यासकार कथा भन्ने शैलीमा माहिर देखिन्छन् । यस उपन्यासले नेपाली उपन्यासको मार्गका एक पृथक छाप छोड्न सक्ने अनुमान गरिएको छ ।

‘यस उपन्यासका घटना र पात्रको अतीत वा वर्तमानका घटना र पात्रसँग कुनै सम्बन्ध छैन । सबै घटना । पात्र काल्पनिक भए पनि कसैको जीवनसँग मिल्न गए संयोग मात्र हुनेछ’ भन्ने लेखकीय दावी उपन्यासको सुरुवातमा गरिएको छ । उपन्यासले मानवीय संवेदनालाई साह्रै मसिनो र सुकोमल रूपमा स्पर्श गर्र्न सक्ने छ भन्ने लेखकीय आशय रहेको छ ।

साङ्ग्रिला बुक्सले यस अगि बरालका ‘सिकाउने शैली’, ‘सिकाइ र सहयोग’, ‘स्यानी’ र ‘आँगनीको फूल’ जस्ता कृतिहरू प्रकाशित गरिसकेको छ ।

प्रतिक्रिया