नेपालमा राजसंस्था पुनःस्थापनाको माग राख्दै राजावादीहरूको समूहद्वारा गरिएको आन्दोलनको रिपोर्टिङका क्रममा आगजनीमा परी एभिन्युज टेलिभिजनमा कार्यरत पत्रकार सुरेश रजकको मृत्यु भएको प्रति नेपाल अमेरिका पत्रकार संघ (नेजा) दुःख व्यक्त गर्दछ । नेजा स्व. रजकप्रति भावपूर्ण श्रदाञ्जली अर्पण गर्दै शोकसन्तप्त परिवारजनमा हार्दिक समवेदना प्रकट गर्दछ । यसैगरी, आन्दोलनका क्रममा पत्रकार दिनेश गौतममाथि भएको कुटपिट, अन्नपूर्ण मिडिया समूहको कार्यालय भवनमा तोडफोड तथा आगजनी, कान्तिपुर टेलिभिजन भवनमा गरिएको ढुङ्गामुडा र हिमालय टेलिभिजनको सवारीसाधनमा गरिएको तोडफोडप्रति नेजा गम्भीर आपत्ति प्रकट गर्दछ ।

नेपालको संविधानले नै पूर्ण प्रेस स्वतन्त्रताको सुनिश्चितता गरेको अवस्थामा प्रेस जगत् नै असुरक्षित रहेको सन्देश प्रवाह गर्ने यस्ता अराजक गतिविधिको भर्त्सना गर्दै नेपाल सरकारलाई प्रेस स्वतन्त्रता, सञ्चारमाध्यमको संरक्षण र पत्रकारको जिउ-ज्यानको रक्षाका लागि गम्भीर बन्न पनि नेजा आग्रह गर्दछ । साथै, निर्भीक ढङ्गबाट पत्रकारिता गर्ने वातावरण निर्माणका लागि सम्बद्व सबै पक्षसँग नेजा हार्दिक अपिल गर्दछ । निर्भीक पत्रकारिताको सुनिश्चितता र नेपाली पत्रकारको सुरक्षाका सवालमा नेपाल पत्रकार महासंघसँग नेजा सँगै रहेको र महासंघले गर्ने कार्यक्रममा नेजाको ऐक्यबद्वता रहेको छ ।

यसैगरी, आन्दोलनका क्रममा ज्यान गुमाएका सविन महर्जनप्रति नेजा हार्दिक श्रदाञ्जली अर्पण गर्दै शोकसन्तप्त परिवारजनमा हार्दिक समवेदना प्रकट गर्दछ । साथै, आन्दोलनका क्रममा घाइते भएकाहरूको शीघ्र स्वास्थ्य लाभको नेजा कामना गर्दछ ।

बाबुराम दाहाल
महासचिव

नेपाल अमेरिका पत्रकार संघ (नेजा) ।