सिरियामा रहेको अमेरिकी दूतावासले आफ्ना नागरिकलाई “तत्काल देश छोड्न”आग्रह गर्दै रमजान सकिने बेलामा आतंकवादी आक्रमण हुन सक्ने चेतावनी दिएको छ।

दूतावासले शुक्रबार राति आफ्नो संजालस्थल (वेबसाइट)मा प्रकाशित गर्दै इद उल-फित्र मनाइने मार्च अन्त्यतिर “अमेरिकी दूतावास, अन्तर्राष्ट्रिय संस्थाहरू र सिरियाली सार्वजनिक कार्यालयहरू” मा आक्रमण हुन सक्ने सम्भावना रहेको जनाएको छ।

“आक्रमणका तरिकाहरूमा एकल हमलाकारी, सशस्त्र समूह वा विस्फोटक उपकरण प्रयोग हुन सक्छ,”दूतावासको सूचनामा उल्लेख गरिएको छ।

साथै अमेरिकी विदेश मन्त्रालयले सिरियाका लागि यात्रा परामर्श स्तर ४ मा राखेको छ, जसको अर्थ कुनै पनि अवस्थामा अमेरिकाले आफ्ना नागरिकलाई त्यहाँ यात्रा नगर्न सिफारिस गरेको छ।

“सिरियामा आतंकवाद, गृहयुद्ध, अपहरण, बन्धक बनाउने, सशस्त्र द्वन्द्व र अनुचित हिरासतको उच्च जोखिम भएकाले यो चेतावनी लागू गरिएको छ,”दूतावासले जनाएको छ।

सिरियामा गृहयुद्ध सुरु भएपछि सन् २०१२ मा अमेरिकी दूतावासले आफ्नो सेवा स्थगित गरेको थियो। गत वर्ष इस्लामवादी समूह हयात तहरीर अल-शाम (HTS) ले नेतृत्व गरेको विपक्षी गठबन्धनद्वारा तत्कालीन राष्ट्रपति बशर अल-असद अपदस्थ भए। हाल अहमद अल-शराआ सिरियाको अन्तरिम राष्ट्रपति छन्।

हाल अमेरिकी नागरिकहरूलाई सहयोग गर्न अमेरिकाले चेक गणतन्त्रलाई ‘संरक्षण शक्ति’ का रूपमा नियुक्त गरेको छ।

“सिरियामा रहेका अमेरिकी नागरिकहरूले आपत्कालीन सहयोगको आवश्यकता परेमा चेक गणराज्यको दूतावासमा रहेको अमेरिकी कार्यालयमा सम्पर्क गर्नुपर्छ,”दूतावासले जनाएको छ।