कांग्रेसका सांसद रामहरी खतिवडाले देश संकटमा परेको बेला सबै दल एकताबद्ध भएर अघि बढ्नुपर्नेमा प्रमुख प्रतिपक्षका कारण संसद् अवरुद्ध भएको बताएका छन्।

आइतबार विपक्षी दलहरूको अवरोधले प्रतिनिधिसभा बैठक स्थगित भएपछि संसद् भवनबाहिर पत्रकारहरूसँग कुरा गर्दै उनले यो धारणा राखेका हुन्।

खतिवडाले देशमा समस्या देखिएको अवस्थामा सांसदहरूले संसद्मा एकजुट भएर आफ्ना कुरा राख्ने प्रचलनविपरीत प्रतिपक्ष उभिएको आरोप लगाए।

सभामुखले आपत्कालीन समय उपलब्ध गराउने आश्वासन दिँदा पनि विपक्षीले संसद् चल्न नदिएको उनको भनाइ छ। “प्रधानमन्त्रीले सोमबार संसद्मा जवाफ दिने गरी सभामुखले जानकारी दिइसक्दा पनि प्रतिपक्षले बैठक अवरुद्ध गर्‍यो,” उनले भने।

उनले भने, “सत्तापक्ष र प्रतिपक्ष आफ्नो ठाउँमा होला, तर देश अप्ठ्यारोमा परेका बेला सबै सांसदले एकताबद्ध भएर संसद्मा कुरा राख्ने प्रचलन छ। सभामुखले ‘म समय दिन्छु’ भन्दा पनि प्रमुख प्रतिपक्षले मानेनन्। हामीले आपत्कालीन समय लिएर सबैले बोल्न पाउनुपर्छ भन्ने माग राखेका थियौं।”

खतिवडाका अनुसार, सभामुखले प्रधानमन्त्री सोमबार उपस्थित हुने जानकारी दिए पनि विपक्षीले आइतबारको बैठक चल्न दिएनन्।

सांसद खतिवडाले तीनकुने घटनाको प्रसंग जोड्दै संविधानको शपथ लिएर आएकाहरूले नै संविधान समाप्त पार्ने खेल खेलेको गम्भीर आरोप लगाए। “संसद्लाई बन्धक बनाएर संविधानमाथि प्रहार गर्न खोजिएको छ,”।