अमेरिकाको फ्लोरिडा राज्यको मायामीमा चालकले गोली प्रहार गरे पछि बस(यात्रीयान) का २ जना यात्रीको मृत्यु भएको छ । दुवै मृतक पुरुष भएको एबिसीन्यूजले उल्लेख गरेको छ ।

फ्लोरिडा ,मायामी-डेड मार्गमा चल्ने यात्रियान (बस)चालकले यात्रुहरूसँग भएको झगडामा गोली प्रहार गरी २ जनाको हत्या गरेको घटनाको अनुसन्धान भइरहेको छ।

यो गोलीकाण्ड ३ बजे बिहानको आसपास भएको हो । मायामी-डेड मार्गमा चल्ने बस चालक दुई पुरुष यात्रुसँग झगडामा संलग्न भएको मायामी गार्डन्स प्रहरी विभागका अधिकारी डायना डेलगाडोले आइतबारको पत्रकार सम्मेलनमा जानकारी दिइन्।

झगडाको क्रममा चालकले हतियार निकालेर ती यात्रुहरूलाई गोली हान्न थाले। गोली लागेका दुई यात्रुहरूलाई अत्यन्त गम्भीर अवस्थामा अस्पतालमा लगिएको थियो र पछि उनीहरूको मृत्यु भयो।

स्थानीय संचारमाध्यम डब्लुपिएलजीले बताए अनुसार गोली लागेका दुबै पीडित पुरुष थिए। प्रहरीले घटनाको विस्तृत विवरण नदिएको र गाडी चलिरहेको थियो वा थिएन भन्ने कुरा स्पष्ट नगरेको एबिसीन्यूजले जनाएको छ ।

यात्रीयान चालकलाई प्रहरी नियन्त्रणमा लिइएको छ । घटनाको अनुसन्धान भइरहेको प्रहरी अधिकारीले जानकारी दिएका छन्।