९ महिना अन्तरिक्षमा फसेका नासाका दुई अन्तरिक्षयात्रीहरू क्रमस भारतीय मूलकी सुनिता अर्थात् सुनी विलियम्स र बुच विलमोरले पृथ्वीमा आए पछि पहिलो पटक संचार माध्यमसँग बोलेका छन् । कार्यक्रमको आयोजना नासाले गरेको थियो ।

उनीहरुले संचारकर्मीहरुको समेत उत्तर दिए । दुवैलाई केवल एक साताको लागि तय गरिएको अन्तरिक्ष यात्रा अन्तरिक्ष यान समस्याका कारण ९ महिनाभन्दा बढी लम्बिएको थियो । उनीहरू गत मार्च १८ मा पृथ्वीमा फर्किएका थिए।

उनीहरु बोइङ स्टारलाइनर अन्तरिक्ष यानमार्फत अन्तर्राष्ट्रिय अन्तरिक्ष स्टेशनमा गएका थिए । विभिन्न प्राविधिक समस्याहरू देखिए। कतिपयले उनीहरूलाई “फसेका” वा “परित्याग गरिएका” भनेर व्याख्या गरे पनि विलियम्स र विलमोरले त्यस कुरालाई अस्वीकार गरे।

नासाको पत्रकार सम्मेलनमा बोल्दै विलियम्सले भनिन्, “हामी सधैं फर्कनै नै थियौं।” यो यात्रा विशेष थियो, जसबाट धेरै सिक्न सकिन्छ ,उनले थपिन् ।

विलियम्सका अनुसार, उनीहरूले विशेष कार्य (मिसन)अघि नै बुझेका थिए । उनीहरुलाई नयाँ अन्तरिक्ष यानको परीक्षण गर्नु चुनौतीपूर्ण हुने भन्ने थाहा थियो । तर, अप्रत्याशित रूपमा विशेष कार्य लम्बिँदा उनीहरूले परिस्थितिलाई सहज रूपमा स्वीकारे।

“हामी आइएसएसको टोलीका सदस्य थियौं र अरू सबैजस्तै वैज्ञानिक अनुसन्धानमा लाग्यौं,” विलियम्सले भनिन्।

विलमोरका अनुसार स्टारलाइनर यान पूर्ण रूपमा सक्षम छ। “हामीले भेटेका समस्याहरू सुधार्नेछौं,” उनले भने। उनले भविष्यमा यो यानमा पुनः यात्रा गर्ने विश्वास व्यक्त गरे।

अन्तरिक्षमा हुँदा कुनै राजनीति महसुस नगरेको बताउँदै अन्तरिक्षयात्री निक हेगले भने, “हामी त्यहाँ काममा केन्द्रित थियौं।”

तर, विलमोरले फक्स न्यूजलाई दिएको अन्तर्वार्तामा उनीहरू “केही हदसम्म”फसेको महसुस भएको बताएका थिए । तर परित्याग गरिएको भन्ने आरोप असत्य भएको जनाए ।

राष्ट्रपति डोनाल्ड ट्रम्प र स्पेसएक्सका प्रमुख कार्यकारी अधिकारी इलन मस्कले अन्तरिक्षयात्रीहरूको शीघ्र फिर्तीका लागि आफूहरूले भूमिका खेलेको दाबी गरेका छन्। ट्रम्प र मस्कले बाइडेन प्रशासनलाई “राजनीतिक कारणले” अन्तरिक्ष यात्रीहरूलाई फसाएको आरोप लगाए पनि यसको कुनै प्रमाण छैन।

विलमोरले मस्क र ट्रम्पलाई समर्थन गर्दै भने, “तपाईहरूले मलाई अविश्वास गर्ने कुनै कारण दिनुभएको छैन।”