इजरायली रक्षा मन्त्रीइजरायल काट्जले गाजामा इजरायली सैन्य कारबाही थप व्यापक भइरहेको बताएका छन्। उनले “आतङ्ककारी र तिनको पूर्वाधारलाई ध्वस्त पार्ने” र “ठूला भूभाग कब्जा गरी इजरायलको सुरक्षा क्षेत्रमा गाभ्ने” उद्देश्य रहेको बताएका छन्।

उनले गाजाका स्थानीयहरूलाई तत्काल हमासको विरुद्ध उत्रिन र अपहरणमा परेका इजरायलीहरूलाई फिर्ता गर्न आह्वान गरेका छन्। “यो युद्ध अन्त्य गर्ने एकमात्र उपाय हो,” उनले भने।

इजरायलले मार्चमा गाजामा पुनः आक्रमण सुरु गर्‍यो। यसअघि दुई महिनासम्म स्थगित गरिएको कारबाहीका क्रममा हमासले ३३ इजरायली बन्धक मुक्त गरेको थियो भने १,८०० जना प्यालेस्टिनी बन्दीहरूको अदला-बदली भएको थियो।

इजरायलले अझै ५९ जना बन्धकहरूको तत्काल रिहाइको माग गरेको छ। तिनीहरूमध्ये २४ जना जीवित रहेको अनुमान छ।

प्रधानमन्त्री बेन्जामिन नेतान्याहूले मार्च १८ मा पुनः आक्रमण आदेश दिएपछि इजरायली बमबारी “पूरा शक्तिसहित” पुनः सुरु भएको छ। “वार्ता अब गोलाबारी चलिरहेकै अवस्थामा मात्र हुनेछ,” उनले भने।

इजरायली कारबाहीको इजिप्ट, साउदी अरब र जोर्डनले आलोचना गरेका छन्। तर इजरायली अधिकारीहरूले वाशिङ्टनसँग पूर्ण समन्वय रहेको बताएका छन्।

इजरायलले हमासलाई पूर्ण रूपमा नष्ट गरी गाजाको नियन्त्रण राख्ने योजना बनाएको नेतान्याहू, काट्ज र अन्य अधिकारीहरूले बताएका छन्।

यसैबीच, काट्जले गत महिना गाजाका बासिन्दाहरूको “स्वेच्छिक बसाइँसराई” को लागि नयाँ निकाय गठन गरिएको बताएका थिए ।

संयुक्त राष्ट्रसंघ र मानव अधिकार समूहहरूले यसलाई “जातीय सफाया” भन्दै आलोचना गरेका छन्। इजरायलले यस्तो आरोप अस्वीकार गरेको छ।

गाजामा जारी युद्धले ठूलो विनाश गरेको छ। अक्टोबर ७ को हमास आक्रमणमा इजरायलमा १,२०० जनाको मृत्यु भएको थियो। त्यसपछि सुरु भएको इजरायली कारबाहीमा गाजामा ५०,३०० भन्दा बढीको मृत्यु र १,१४,००० भन्दा बढी घाइते भएको गाजाको स्वास्थ्य मन्त्रालयले जनाएको छ।