अमेरिकी रक्षा सचिव पिट हेगसेथले पानामा नहरमा चीनको प्रभाव अन्त्य गर्दै अमेरिका र पानामाले रणनीतिक साझेदारी बलियो बनाएको घोषणा गरेका छन्।

मंगलवार आयोजित एक प्रेस सम्मेलनमा उनले भने, “संयुक्त राज्य अमेरिका साम्यवादी (कम्युनिस्ट) चीन वा कुनै पनि देशलाई यो नहरको सञ्चालन वा अखण्डता खतरामा पार्न दिने छैन।”

हेगसेथका अनुसार हालैका केही साताहरूमा अमेरिका र पानामाबीच सुरक्षा र रक्षा सहकार्यमा दशकौँ पछिको ठूलो प्रगति भएको छ। उनले दृढ स्वरमा भने, “चीनले यो नहर बनाएको होइन, चीनले यो नहर सञ्चालन गरेको होइन, र चीनले यो नहरलाई हतियार बनाउने छैन।”

यसै वर्ष देखि पानामा चीनसँगको बेल्ट एन्ड रोड इनिसिएटिभ (बिआरआइ) सम्झौताबाट औपचारिक रूपमा फिर्ता भएको छ, जुन ट्रम्प प्रशासनप्रति समर्थनको संकेत मानिएको छ।

हेगसेथले चीनको सम्भावित निगरानी र गुप्त गतिविधिका लागि बनाइएका “महत्त्वपूर्ण पूर्वाधार”प्रति चिन्ता व्यक्त गर्दै भने, “यसले पानामा र अमेरिकालाई कम सुरक्षित, कम समृद्ध र कम सार्वभौम बनाउँछ।”

उनले थपे, “हाम्रो सुरक्षा साझेदारी आगामी महिनाहरू र वर्षहरूमा अझ बलियो हुँदै जानेछ – चीनको चुनौतीहरूको सामना गर्न यो अपरिहार्य छ।”