राष्ट्रपति डोनाल्ड ट्रम्पद्वारा लगाइएको पछिल्लो भन्सार शुल्क (ट्यारिफ)पछि चीनले अमेरिकामाथि कडा प्रतिक्रिया दिएको छ। चिनियाँ विदेश मन्त्रालयका प्रवक्ता लिन जियानले बुधबार पत्रकार सम्मेलनमा भने, “चीन दृढ र कडा कदम चाल्नेछ। हाम्रो सार्वभौमिकता, सुरक्षा र विकासलाई कसैले पनि हानी पुर्‍याउन सक्दैन।”

उनले भने, “हामी बहुपक्षीयता र समावेशी विश्वव्यापीकरणको समर्थन गर्न सबै पक्षहरूसँग सहकार्य गर्न तयार छौँ। चीनका जनताहरूको वैध विकास अधिकार कसैले खोस्न सक्दैन।”

लिनले चीन कुनै पनि एकपक्षीयता, संरक्षणवाद र जोखिमपूर्ण नीतिहरूको विरोध गर्ने र साँचो बहुपक्षीयतालाई सुदृढ गर्न चाहने बताएका छन्। साथै, उनले विश्वव्यापी आर्थिक स्थिरता र साझा हितको पक्षमा उभिनुपर्नेमा जोड दिए।

“भन्सार शुल्कले ढुवानी लागत बढाउँछ, मुद्रास्फीति बढाउँछ, र विश्व स्थिरता खल्बल्याउँछ,” उनले चेतावनी दिँदै भने, “यसले आफैं अमेरिकालाई पनि चोट पुर्‍याउँछ।”

चीनले अमेरिकी कदमलाई “गलत निर्णय” भन्दै त्यसलाई सच्याउन आग्रह गरेको छ।

राष्ट्रपति ट्रम्पको प्रशासनले अप्रिल ९ मा चीनमाथि थप १०४% भन्सार शुल्क घोषणा गरेपछि चीनको यो प्रतिक्रिया आएको हो। यद्यपि ट्रम्पले चीन सम्झौताका लागि आतुर रहेको बताएका थिए, चीनले भने आफूलाई दबाबमा पार्ने प्रयास सहन नसकिने स्पष्ट रूपमा जनाएको छ।