भर्जिनिया, नोभेम्बर १६, २०२४ – डिएमभि युथ एकाडेमीको आयोजनामा दोस्रो भर्जिनिया भेटेरन्स कप २०२४ भव्य रूपमा सम्पन्न भएको छ । नेपाली समुदायलाई खेलकुदको माध्यमबाट एकताबद्ध गर्ने उद्देश्यले आयोजित यस प्रतियोगितामा ११ टोलीले सहभागिता जनाएका थिए । यो प्रतियोगिता सामूहिक जोश र उत्कृष्ट खेल कौशलका साथ सम्पन्न भएको थियो, जसले नेपाली खेलकुदको क्षेत्रमा नयाँ आयाम थपेको छ ।

विजेता र उपविजेता :

घ्यालसुम्दो सेवा सँस्था युएसएले आफ्नो उत्कृष्ट प्रदर्शन गर्दै च्याम्पियनको उपाधि जित्न सफल भएको थियो । फाइनल खेलमा उसले डिसिएनएफसी सकरलाई हराउँदै विजयी भएको हो । डिसिएनएफसी सकरले उत्कृष्ट रणनीति र टीमवर्कको प्रदर्शन गर्दै उपविजेताको स्थान सुरक्षित गर्‍यो ।

फाइनल खेलको पहिलो हाफ निकै प्रतिस्पर्धात्मक रह्यो, जहाँ दुवै टोलीले गोल गर्ने प्रयास गरे । दोस्रो हाफमा घ्यालसुम्दोले आफ्नो आक्रमणलाई प्रभावकारी बनाउँदै निर्णायक गोल गर्न सफल भयो । डिसिएनएफसी सकरको उत्कृष्ट खेल कौशल र संघर्षले दर्शकहरूलाई रोमाञ्चक अनुभव दिलायो ।

सहभागी टोलीहरूको प्रदर्शन :

यस प्रतियोगितामा सहभागी टोलीहरूले उच्च स्तरको खेल प्रस्तुत गर्दै दर्शकहरूको मन जितेका थिए । सबै टिमका खेलाडीहरूले आफ्नो उत्कृष्ट कौशल देखाएका थिए । साथै, सेमिफाइनल खेलहरूले निकै चासो र उत्साह उत्पन्न गर्‍यो, जसमा प्रत्येक टोलीले आफ्नो क्षमता प्रदर्शन निकै उत्कृष्ठ थियो ।

खेल व्यवस्थापन र योगदानकर्ताहरू :

खेललाई निष्पक्ष र व्यवस्थित बनाउन रेफ्री विषाल मगर र प्रदीप कार्की को भूमिका महत्त्वपूर्ण रह्यो । जेन ट्राभल्सले हामीलाई साथ दिएको थियो । गणेश पाण्डे, प्रदीप घर्ती, पूजा के. परियार, मनोज सुबेदी, माधव गौतम, प्रदीप कार्की, साथै अहोरात्र खट्ने मिलन गौर्खाली लगायतका व्यक्तिहरूको योगदान प्रतियोगिता सफल बनाउन अत्यन्त महत्वपूर्ण थियो ।

अर्को कदम: तेस्रो संस्करणको तयारी :

आयोजक टोलीले प्रतियोगितालाई सफल बनाउन सहयोग गर्ने सबैलाई धन्यवाद व्यक्त गर्दै आगामी तेस्रो भर्जिनिया भेटेरन्स कप २०२५ लाई अझ रोमाञ्चक र स्तरीय बनाउने प्रतिबद्धता व्यक्त गरेको छ । खेलका विशेष क्षणहरू समेटिएका अन्य तस्वीरहरू केही दिनभित्र सार्वजनिक गरिने आयोजक बताउॅंछ ।

विशेष धन्यवाद :

यो समाचार तयार गर्न विशेष सहयोग पुर्‍याउनु हुने बिजय बगालेलाई आयोजकले हार्दिक धन्यवाद व्यक्त गरेको छ ।

डिएमभि युथ एकाडेमीको (नेपाली समुदायलाई खेलकुदको माध्यमबाट एकताबद्ध गर्ने अभियानमा निरन्तर सक्रिय)